Nguāi Muōng Gōng Nṳ̄ Muōng Tiăng

關於部落格
我罔講汝罔聽A blog in Romanized Foochowese and more...
  • 1105

    累積人氣

  • 0

    今日人氣

    0

    訂閱人氣

我其人生之路著怎行?

Sèng guī nĭk, nguāi kō̤ uòng lāu ngiēng-giú-sĕng diē-hŏk chŭ-ché. Gōng sĭk-câi gì, Dà̤-mŭk duâi-buô-hông dŭ bī-gáu ṳ̀ng-ê, dáng-sê gêng-cĕng iā gék-liĕk, nguāi mò̤-gāng gōng ék-diâng â̤ kō̤ siông. Bók-guó, dó̤i-ṳ̀ nguāi ciŏng-uâng ng-sê ŏ̤h nguôi-ngṳ̄ gì hŏuk-sĕng, mò̤-lâung sê bê-kō̤ sèng-hâiu gì páh-piăng, gó-sê găh kō̤-diòng gì huák-hŭi, nguāi dŭ mò̤ mì-hâng lāu.前幾日,我考完了研究生底學初試。講實在其,題目大部分都比較容易,但是競爭野激烈,我無敢講一定會考上。不過,對於我縂款伓是學外語其學生,無論是備考辰候其拍拼,故是洽考場其發揮,我都無遺憾了。
Gì-sĭk, nguāi buōng-kuŏ sê tĕ̤k dê-lī-séng-sék-hiê-tūng (GIS) gì. Ciā ciŏng-ngiĕk nguāi táu-dā̤ dŭ mò̤ héng-ché̤ṳ, cuō-iéu sê ĭng-ôi nguāi ngâung-hìng-ngâung-nō̤, ŏ̤h só-hŏk cĭng siăh-lĭk; bêng-chiā, nguāi iá ng huăng-hī có̤ ké̤k dê-lī hĕ̤k-ciā diêng-nō̤ siŏng-guăng gì gĕ̤ng-cáuk. Kiŭ-gék-ī ô gōng, "Ái nṳ̄ sō̤ có̤ gì, ng-tĕ̤ng có̤ nṳ̄ sō̤ ái gì. (Love what you do, don't do what you love.)" Nguāi mâ̤ dùng-é: Nè̤ng nâ-sê ciŏng ĭ gì héng-ché̤ṳ gâe̤ng gĕ̤ng-cháuk iòng-ciòng buŏng-kŭi, ĭ huâng-sié siŏh-sié-nè̤ng dŭ mâ̤ kuái-lŏk a.其實,我本科是讀地理信息系統(GIS)其。者專業我透底都無興趣,主要是因爲我戇形戇腦,學數學真食力;並且,我亦伓歡喜做乞地理或者電腦相關其工作。邱吉爾有講,“愛汝所做其,伓通做汝所愛其。(Love what you do, don't do what you love.)”我賣同意:儂若是將伊其興趣共工作完全分開,伊犯勢蜀世儂都賣快樂啊。
Nguāi cī-lùng kiê găk nguāi ìng-sĕng gì sĕk-cê-lô-kāu, ô iā sâ̤ sōng-dĕk ĕng nguāi méng-sèng. Sèng-dău gì dIô diŏh ciōng giàng? Siŏh guó uâ: Có̤ nguāi sō̤ ái gì. Sŏ̤k màng-buŏ siăh màng gì sèng-hâiu, nguāi mă gâe̤ng nguāi gōng gáu nguāi gì lī-siōng. Ĭ iá lī-gāi nguāi gì siōng-huák, ciĕ-tì nguāi gì mū-ngṳ̄ cīng-giú sê̤ṳ-ngiĕk. Ĭ gōng, "Có̤ sié-nó̤h dâi-gié, nâ sê nṳ̄ cê-gă ngiòng-é, nguāi dŭ ciĕ-tì nṳ̄. Nṳ̄ diŏh nêng-cĭng có̤, nū-lĭk có̤ céu hō!" Lòng-nā̤ gì uâ nguāi dŏng-iòng â̤ gé diâng-diâng lā̤. Mò̤-guāng hŭng-ṳ̄ ô nuâi duâi, nguāi dŭ â̤ có̤-miâng giàng gáu dā̤.我只輪洽我人生其辻字路口,有野侈選擇攖我面前。前兜其路著怎行?一句話:做我所愛其。昨暝晡食暝其辰候,我媽共我講遘我其理想。伊亦理解我其想法,支持我其母語拯救事業。伊講,“做什乇事計,哪是汝自家願意,我都支持汝。汝著認真做、努力做就好。”郎奶其話我當然會記定定嚟。無管風雨有大,我都會做命行遘底。


【註】
透底:táu-dā̤,從來
戇形戇腦:ngâung-hìng-ngâung-nō̤,愚蠢糊塗的樣子
徛:kiê,
偌:nuâi,多麽
做命:có̤-miâng,拼命地不顧一切地
相簿設定
標籤設定
相簿狀態