Nguāi Muōng Gōng Nṳ̄ Muōng Tiăng

關於部落格
我罔講汝罔聽A blog in Romanized Foochowese and more...
  • 1105

    累積人氣

  • 0

    今日人氣

    0

    訂閱人氣

福建事變,福建儂伓通賣記其歷史

Hók-gióng Sê̤ṳ-biéng, iá miàng "Mìng-biéng", sê Guók-mìng Céng-hū Dâ̤-sĕk-gāu-lô-gŭng cióng-līng Lī Cá̤-chĭng, Dìng Mìng-sṳ̆, Ciōng Guŏng-nâi, Chái Dìng-kāi dēng nè̤ng lièng-hăk Guók-mìng-dōng nô̤i-buô huāng-ciōng sié-lĭk găh Hók-gióng huák-dông gì gŭng-biéng. Ék-gāu-săng-săng nièng lĕ̤k nguŏk ék hô, Ciōng Guŏng-nâi, Chái Dìng-kāi găh Hók-ciŭ huák-biēu tŭng-diêng, gŭng-kăi huāng-dó̤i Nàng-gĭng Céng-hū gì siĕu-gĭk kóng-nĭk céng-cháik. Sĕk-ék nguŏk niék hô̤, "Dṳ̆ng-guók Ìng-mìng Lìng-sì Dô̤i-biēu Dâi-huôi" diŏh Hók-ciŭ Nàng-hâu-diòng (gĭng Ngô-ék Guōng-diòng) diéu-kăi, huák-biēu Ìng-Mìng Kiòng-lê Sŏng-Ngiòng. Niék-ék hô̤, Hók-giòng Ìng-mìng Céng-hū sŏng-buó táuk-liê Guók-mìng-dōng, lêng gióng Sĕng-sāng-ìng-mìng-dōng. Niék-nê hô̤, Hók-gióng Ìng-mìng Céng-hū sōng-buó Hók-gióng dŭk-lĭk, guók-hô̤ Dṳ̆ng-huà-gê̤ṳng-huò-guók, gāi ék-gāu-săng-săng nièng ùi Dṳ̆ng-huà-gê̤ṳng-huò-guók Ngiòng-nièng.

福建事變,亦名“閩變”,是國民政府第十九路軍將領李濟深、陳銘樞、蔣光鼐、蔡廷鍇等儂聯合國民黨內部反蔣勢力洽福建發動其軍變。一九三三年六月一號,蔣光鼐、蔡廷鍇洽福州發表通電,公開反對南京政府其消極抗日政策。十一月廿號,“中國人民臨時代表大會”著福州南校場(今五一廣場)召開,發表《人民權利宣言》。廿一號,福建人民政府宣佈脫離國民黨,另建生産人民黨。廿二號,福建人民政府宣佈福建獨立,國號中華共和國,改一九三三年為中華共和國元年。

Cĭ-âu, Ìng-mìng Céng-hū káuk-dêng siū-dŭ Hók-ciŭ, ciŏng Hók-giòng Gê̤ṳng-huò-guók buŏng ùi Mìng-hāi, Iòng-gióng, Hĭng-ciòng, Tĭng-ciŏng sé sēng. Nô̤i-dṳ̆ng, Mìng-hāi sēng tūng-guāng Mìng-hâu, Diòng-lŏk, Hók-chiăng, Lièng-gĕ̤ng, Lò̤-ngiòng, Kŭ-chèng, Mìng-chiăng, Bìng-nàng, Īng-tái, Hà-puō, Hók-dĭng, Hók-ăng, Nìng-dáik, Sêu-nìng, êng-mêng Hò̤ Gŭng-gāng ùi Sēng-diōng. Hók-giòng ciáh dŭk-lĭk, mā-siông hóng-ṳ̄ng kóng-nĭk. Cháu-gāu hū-bâi gì Ciōng Gái-sĭk Guók-mìng Céng-hū, mò̤-gó mìng-cŭk ăng-ngùi, ngâing-chúi gōng "iōng nguôi bék siĕng ăng nô̤i", sáuk-līng dê̤ṳng-bĭng háik-chŏ̤ dàng-ák Hók-gióng Ìng-mìng gì dŭk-lĭk ông-dông. Hók-giòng-guók ĭng-ôi ké̤ṳk Guók-mìng Céng-hū gŭng-sê̤ṳ lĭk-liông siŏng-chă kák hiông, găh ék-gāu-săng-sé nièng ék nguŏk niék-ék hô̤ lòng-hâng.

之後,人民政府確定首都福州,將福建共和國分爲閩海、延建、興泉、汀漳四省。内中,閩海省統管閩侯、長樂、福清、連江、羅源、古田、閩清、屏南、永泰、霞浦、福鼎、福安、寧德、壽寧,任命何公敢為省長。福建獨立,馬上奮勇抵日。臭垢腐敗其蔣介石國民政府,無顧民族安危,硬喙講“攘外必先安内”,率領重兵血臊彈壓福建人民其獨立運動。福建國因爲乞國民政府軍事力量相差恰遠,洽一九三四年一月廿一號淪陷。

Hók-gióng Sê̤ṳ-biéng, sê Hók-gióng ìng-mìng gâe̤ng áuk-cék gì tūng-dê-ciā ṳ̄ng-găng kóng-cĕng gì guŏng-ìng lĭk-sṳ̄, īng-iōng sê nāng-gă Hók-gióng nè̤ng gì giĕu-ngô̤!

福建事變,是福建人民共惡質其統治者勇敢抗爭其光榮歷史,永遠是咱家福建儂其驕傲!

福建共和國國旗


【註】
乍:ciáh,
臭垢:cháu-gāu,腐敗變質的惡臭
血臊:háik-chŏ̤,血腥味
彈壓:dàng-ák,鎮壓
惡質:áuk-cék,邪惡
相簿設定
標籤設定
相簿狀態