Nguāi Muōng Gōng Nṳ̄ Muōng Tiăng

關於部落格
我罔講汝罔聽A blog in Romanized Foochowese and more...
  • 1105

    累積人氣

  • 0

    今日人氣

    0

    訂閱人氣

鄭堂燒火炮,除死無大災!

Dâng Dòng cê Nṳ̄-ngòng, hô̤ lā̤ "Sióh-ciĕu Săng-ìng", sê siŏh ciáh Séu-cè̤ṳ. Ĭ gìng gì cṳ̆ uâ, sĭ sṳ̄ gŏ̤ hô, hùng-nó̤h d̤u â̤. Có̤ nè̤ng sōng-dĭk huăk-kiĕ, nguôi-hô̤ "Huăk-kiĕ Sĭ-ìng". Ĭ bàng-só-siòng huăng-hī dā-bô̤-bók-bìng, ng-giăng ô sié-lĭk gì nè̤ng.鄭堂字汝昂,號嚟“雪樵山人”,是蜀隻秀才。伊琴棋書畫、詩詞歌賦,逢乇都會。做儂爽直滑稽,外號“滑稽詩人”。伊平素常歡喜打抱不平,伓驚有勢力其儂。
Ĭ mò̤ siōng có̤ guăng, niék-gūi huói gì sèng-hâiu gó diŏh chuó lā̤. Cī siŏh nĭk, sê Ciáng-nguŏk Chĕ̤-ék, ĭ áuk kī dĕk-biék cā, ciáh lā̤ mòng lā̤ gé̤ṳng nièng-buông, kŭi muòng ciék sĭng-nièng. Hàng-bók-diòng-sì ngiê-dău nè̤ng ngòng-ngòng-dèng, kòng siŏh buô guăng-cài diē muòng lì. Dâng Dòng ngĭk siŏh-â, â̤ báik cuòi sê siù-nè̤ng gâe̤ng ĭ có̤-dó̤i gì, buóh siōng giéu ĭ dō̤-mùi. Ĭ mò̤ có̤ siăng, lĭk-káik dó̤i-hô ciā diòng-méng.伊無想做官,廿幾嵗其辰候故著厝嚟。只蜀日,是正月初一,伊屈起特別早,乍嚟忙嚟供年飯,開門接新年。含不長時外兜儂昂昂騰,扛蜀部棺材底門來。鄭堂蜀下,會仈嚽是仇儂共伊做對其,卜想叫伊倒黴。伊無做聲,立刻對付者場面。
Ĭ céu gâe̤ng kòng guăng-cài gì huō-é gōng: "Kī-dâe̤ng nṳ̄-gáuk-nè̤ng gâe̤ng guăng-cài kòng duâi-muòng chúi go̤." Ĭ dò̤ siŏh bā puō-tàu, gó̤ huō-é gă̤k guăng-cài puái siŏh dó̤i siŏh dó̤i go̤, gê̤ṳ-huōi siĕu kī-li, bék-bék-báuk-báuk, cĭng chiông bóng páu-tiông siŏh-iông. Dâng Dòng táih siŏh ăk lièng-dó̤i diŏh duâi-muòng lā̤: "Hăk Huŏng Huăng-Hī Sáe̤ng Mùi-Ké, Kŭi Muòng Duâi Kék Ngiàng Guăng-Cài." Káng nâu-iĕk gì nè̤ng dŭ duâi-chiéu. Ô siŏh ciáh lâu-nè̤ng duâi-siăng gó̤-gōng: "Dâng Dòng siĕu huōi-páu, dṳ̀ sī mò̤ duâi căi!" Iù-sê cī guó uâ céu liù-diòng gáu gĭng-dáng.伊就共扛棺材其夥計講:“起動汝各儂共棺材扛大門喙去。”伊掏蜀把斧頭,告夥計給棺材破蜀塊蜀塊去,炬火燒起來,嗶嗶爆爆,真像放炮仗蜀樣。鄭堂貼蜀合聯對著大門嚟:“合坊歡喜送黴氣,開門大吉迎官財。”看閙熱其儂都大笑。有蜀隻老儂大聲告講:“鄭堂燒火炮,除死無大災!”由是只句話就流傳遘今旦。

【註】
屈起:áuk-kī,爬起床
含不長時:hàng-bók-diòng-sì,不多久
昂昂騰:ngòng-ngòng-dèng,人聲鼎沸
凝:ngĭk,發楞
炮仗:páu-tiông,鞭炮
相簿設定
標籤設定
相簿狀態