Nguāi Muōng Gōng Nṳ̄ Muōng Tiăng

關於部落格
我罔講汝罔聽A blog in Romanized Foochowese and more...
  • 1100

    累積人氣

  • 0

    今日人氣

    0

    訂閱人氣

討著頭路,蜀箍新其人生卜開始了

"Nguāi Muōng Gōng Nṳ̄ Muōng Tiăng" niék-gūi-nĭk dŭ mò̤ huăng-sĭng lāu. Ng-sê nguāi diâng-tè̤ng, sê ĭng nguāi có̤i-gê̤ṳng dŭ găh Hók-gióng tō̤ gĕ̤ng-cáuk. Huă-huă nuô, dŭ ô nè̤ng siā diêng-cṳ̄-piĕ muóng nguāi: "Nṳ̄ có̤ sié-nó̤h-kuāng gĕ̤ng-cáuk? Sê-ng-sê ngiēng-géu Mìng-ngṳ̄?" Ăik-hâ, bô lì chié-kă̤ nguāi. Gì-sĭk nguāi sê lī-kuŏ-sĕng, diŏh Nàng-gĭng-dâi-hŏk lā̤ ŏ̤h dê-lī-séng-sék-hiê-tūng; chiĕng-uâng mò̤ muóng nguāi guók-hŏk, nâ-mò̤ cĭng-cĭng sê "chék-gŏ̤ muóng báik-gŏ̤, dŭ sê chă-bók-dŏ̤" ah.我罔講汝罔聽”廿幾日都無翻新了。伓是我定蟲,是因我最近都洽福建討工作。花花喏,都有儂寫電子批問我:“汝做什乇款工作?是伓是研究閩語?”哎哈,仅來刺溪我。其實我是理科生,著南京大學嚟學地理信息系統;千萬毋問我國學,哪無汝真真是“七哥問八哥,都是差不多”啊。
Nguāi cī-lùng gì gĕ̤ng-cáuk sê diŏh Hók-gióng-diêng-séng-gŭng-sĭ có̤ tìng-sê̤ṳ-nguòng. Cī gūi nièng dâi-hŏk-sĕng bóng-dáu dò̤ lì diō, ô nièng-ngài tō̤ diŏh gĕ̤ng-cáuk gì, ī-gĭng sê iâ hō̤-miâng lāu. Siā tìng-sê̤ṳ ng-sê téng niōng-cièng, nè̤ng diŏh kī-cā-káung-áng có̤-miâng, buông-uōng ciáh mò̤ páh-dâung. Kō̤-nèng ī-hâiu nguāi dŭ mò̤ nièng-ngài sèu-sèu lì uōng-lô gèng-dēng gâe̤ng dâi-gă có̤-dêng piăng mū-ngṳ̄ (dŏng-iòng ô èng lāu nguāi diâng-diŏh â̤ lì). Nâ sê cūng-kuāng, bèng-iū ah, chiāng nṳ̄ lī-gāi nguāi: Nguāi sê siŏh ciáh nàng-gái, dṳ̀ lāu dó̤i siâ-huôi, dó̤i ùng-huá, dó̤i mū-ngṳ̄ gì iĕk-cìng, gâing iéu-gīng gì sê dó̤i sê̤ṳ-ngiĕk, dó̤i gă-dìng, dó̤i lòng-bâ lòng-nā̤ gì cáik-êng...Ng-sê?我只輪其工作是著福建電信公司做程序員。只幾年大學生糞斗掏來貯,有年呆討著工作其,已經是野好命了。寫程序伓是趁軟錢,儂著起早睏暗做命,飯碗乍無拍逿。可能以後我都無年呆稠稠來網路懸頂共大家做陣拚母語(當然有閑了我定著會來)。哪是縂款,朋友啊,請汝理解我:我是蜀隻男界,除了對社會、對文化、對母語其熱情,更要緊其是對事業、對家庭、對郎罷郎奶其責任……伓是?
Tō̤ diŏh gĕ̤ng-cáuk, nguāi gāng-siōng iā sâ. Sĕ̤ng-kă kiê găh cē̤-nē̤, nguāi buóh ièng cī kuŏ diô kī-giàng lāu. Hŭng muōng páh muōng táiu, ṳ̄ muōng dâung muōng duâi. Sèng-dău gì diô sê hō̤ sê ngài? Nguāi diŏh ciōng giàng? Ék-chiék dŭ káng mâ̤ cĭng. Bók-guó nguāi siŏng-séng, cūng ô siŏh gĕ̤ng, nguāi â̤ giàng gáu hī cô̤ Ŭ-táuk-bŏng, kák kī nguāi sĭng-dā̤ páh-mò̤ cĭng òng gì sō̤-siè...討著工作,我感想野侈。雙骹徛恰即所,我卜沿只箍路起行了。風罔拍罔透,雨罔盪罔大。前兜其路是好是呆?我著怎行?一切都看賣真。不過我相信,總有蜀工,我會行遘許座烏托邦,拾起我心底拍無真其鎖匙……

【註】
定蟲:diâng-tè̤ng,懶惰
花花:huă-huă,時不時地偶爾地
刺溪:chié-kă̤,取笑諷刺
糞斗掏來貯:bóng-dáu dò̤ lì diō,用畚箕來裝形容某物因爲數量極多而不值錢。糞斗,畚箕;貯,
拍逿:páh-dâung,弄丟
暅:òng,(時間長久
相簿設定
標籤設定
相簿狀態